Taaling taaling!
Taaling dima.
Yiko sunkutu jamaa lu lé mu. Yibitaa la kuro la bulo to. Bari sunkutu kiling bi jéé yé wo dang né. Biring ya té dang, iyé jamba kuto lu landayé silo kang. Wulo konoo, moo lu ka woo lé ké sila bondi rango ti. Bari woo lungo jino lu yé jambo lu sawundi yila silo kang.
Kabiring afutata jino lu ma, woo lu kayé ko: "Na nang, ngyé itimo soo." Sunkuto ko yé: "Nté khañi la!" Jino lu kayé ko: "Ngé ikafuño lu béé timo soo lé." Bitung anaata song yaa timo soo. Yikayé ko: "Bari ning ijélé ta, ming fé ibé fa la lé." Saying, anaata taa dalo to iyé kuro ké. Iyé kuro ké, iyé kuro ké... iyé ila fano lu béé ku, iyé béé jaa. Woo moo kémé kémo lu yitaa ta yila ñatonko kili nang. Mandinka saaté lu to, musu kafo lu ka ñatonka ké ning ñatonka muso soto lé. Yité lu lé ka atombong ko Kéra Kunda, Diééré ning nna moo lu. Woo ñatonko lé kanaa yila fano lu ta ning ming mang donkilo la, imang jélé, abuka ila fano dila.
Woo lung ila ñatonko, mim too mu Saara Sonti ti, naata bulo to yikayé ko: "Afélé nga nna fano lu jaa! Bari ning ming mang jélé, ikana ila fano dia la." Yikayé: "Biring nna ñing kafuño naa ta, amang jélé. Ning nga ming fo, abuka jélé. Ning amang jélé ifé, ikana la fano diala." Ñatonko naata fano lu béé taa. Sunkutu kiling naata loo denkili la la: "Sonti nna fano dinna. Sonti nna fano dinna. Saara sonti nna fano dinna." Sonti ya ajinkang: "Mmhmm! Jélé ko jélé ko. Mmhmm! Mang jélé taa." Woo jélé ta, ayé woo la fano diala. Doo fanang naa ta, woo fanang ko:
Sonti nna fano dinna. Sonti nna fano dinna.
Saara sonti nna fano dinna.
Mmhmm! Jélé ko jélé ko.
Mmhmm! Mang jélé taa
Ayé woo fanang la fano diala. Ayé borondi teng né, ayé borondi teng né fo ayé moo tang ñong bang fo mu mowang... fo kémo lu sii ta. Woo lu béé yé denkilo la yijélé ta. Yibéé yé yila fano taa faa tu ta fula. Bitungo sunkutu ndingo kumbo ta. Fulandiango naa ta, aya la ajélé ta. Ayé woo la fano diala. Atuta sunkuto ñing. Abé kumbo la. Ako: " Sonti nna fano dinna. Sonti nna fano dinna. Saara sonti nna fano dinna." Sonti ya ajinkang: "Mmhmm! Jélé ko jélé ko. Mmhmm! Mang jélé taa." Sunkuto mang jélé. Yikayé ko: "Amang jélé! Amang jélé! Ikana diala!" Dindingo kumbo ta ayé denkilo la kotenké bari amang jélé. Saara Sonti ko: "Altaa, ning amang jélé, ntaala fano dila la." Doo lu baafo la: "Alnga ta ngaatu jang. Moo béé jélé ta, até kaa té jélé la. Ngaa fili jang." Bitung ayédonkilo la ajélé ta aboyta. Afaata. Saara Sonti tuta loo ring. Atuta loo ring yé moo lu kili nang yinaata dindingo kama. Saara Sonti tuta loo ring jé. Ika ñing yiri kuntu fing baalu minnu jé loo ring wulo konoo, Saara Sonti lé mu.
